ஒரு மழை நாளில்

ஒரு மழை நாளில்

உனக்கான என் நினைவுகளைப் பத்திரப்படுத்தி

வீட்டுத் திண்ணையில் இருந்தேன்..

எங்கிருந்தோ ஒரு வாசனை

வந்து என் நாசியை நிறைத்தது..

'டேய்.. மழை வரப் போவுதுடா' என்று

வாசலுக்கு சிறுவர்களும்..

துணிகளை எடுக்க ஓடும் பெண்மணிகளும்..

'நனைஞ்சா சளி பிடிக்கும்' என்று

அதட்டும் பெற்றோரும்..

காலையில் எழுதிய கோலம்

அழிந்து போகுமுன்

அழகு பார்த்த பெணகளும்..

பிரித்த குடை நான்கு திசைகளிலும்

நீட்டிக் கொண்டு நிற்கும் எரிச்சலில்

'குடை ரிப்பேர் வரும்போது பார்க்கிறதில்லையா' அதட்டலும்..

'கோவில் புஷ்கரணியில் ஜலம் வந்திருமில்ல' என்று

எதிர் வீட்டு பாட்டியும்..

தெரியாமல் விரல் நீட்டி

மழை நீர் பிடித்து

முகத்தில் அடித்து விளையாடும்

புது மணப் பெண்ணும்..

'வாடகை வாங்க வரப்ப ஒழுகுதுன்னு சொல்லணும்'

என்று கவலையுறும் குடும்பத்தலைவியும்..

'எங்கே மழையில மாட்டிக்கப் போறாரோ' என்று

ஏங்கும் மனைவியும்..

சற்றே என்னை உன்னிலிருந்து பிரித்து

கொட்டும் மழையை சில நிமிடங்கள் ரசிக்க வைத்தன..

ஆனாலும் பெண்ணே..

இந்த மழையில் என்னுடன் நீ

ஒரே குடையின் கீழ் வந்தால்..

எப்படியிருக்கும்.. என்ற ஏக்கம்தான்

இன்னும் அதிகமாய்

உன் நினைவுகளை உயிர்த்தெழுப்பி

மழை நீராய் ஓட வைக்கிறது இப்போதும் !